भारत–पाकिस्तान तनावले पर्यटनमा चिन्ता

भारत–पाकिस्तानबीच पछिल्लो समय तनाव सिर्जना हुँदै गर्दा नेपालको पर्यटन क्षेत्र चिन्तित बनेको छ। दुईवटा दक्षिण एशियाली मुलुकबीचको तनावको प्रभाव नेपालको पर्यटन क्षेत्रमा समेत पर्ने उनीहरुको चिन्ता छ। गर्मि छल्नका लागि यो बेला पोखरामा पर्याप्त भारतीय पर्यटक भित्रिने हुँदा दुइ मुलुकबीचको तनावले भारतीय पर्यटकको आगमन प्रभावित हुनसक्ने उनीहरुको आँकलन छ।  

सीमा क्षेत्रबाट हुनसक्ने घुसपैठको बहानामा आउजाउमा कडाई हुनसक्ने अवस्थामा पर्यटक आगमन प्रभावित हुने त्रास बढेको व्यावसायी बताउँछन्। व्यावसायीका अनुसार भारतीय मात्र नभई भारत हुँदै भित्रिने तेश्रो मुलुकका पर्यटक पनि दुइ मुलुकबीचको तनावका कारण प्रभावित हुनसक्ने जोखिम बढेको छ। ‘युद्धले पर्यटनलाई राम्रो गर्दैन। जहाँसुकैको युद्धले पनि पर्यटन प्रभावित हुन्छ,’ पर्यटन बोर्डका पूर्व सदस्य टिकाराम सापकोटा भन्छन, ‘अझ अहिले त सार्कका दुइ सदस्य मुलुकबीचको यो द्वन्द्वले गर्दा समग्र दक्षिण एशिया नै अशान्त रहेको छ भन्ने सन्देश प्रवाह हुँदा पर्यटकीय गतिविधि पनि प्रभावित हुने त्रास बढेको छ।’