काठमाडौं — नेपाल राष्ट्र बैंकले प्रभु बैंकलाई आफ्नो निर्देशनविपरीत काम गरेको भन्दै कारबाही गरेको छ। राष्ट्र बैंकका अनुसार, प्रभु बैंकले नियमविपरीत सञ्चालक समिति नियुक्त गरेको र वार्षिक साधारणसभाबाट त्यसलाई पारित गरेको पाइएको छ। साथै, बैंकले सर्वसाधारण सञ्चालकको पदावधि समाप्त भए पनि मर्जर तथा प्राप्ति प्रक्रियालाई आफ्नो अनुकूल व्याख्या गर्दै पदावधि गणना गरेको थियो, जसले बैंक तथा वित्तीय संस्थासम्बन्धी ऐनको उल्लङ्घन गरेको छ। यस कारण, राष्ट्र बैंकले प्रभु बैंकको सञ्चालक समितिलाई सम्बन्धित सञ्चालकलाई पदबाट हटाउन निर्देशन दिएको छ।
त्यस्तै, स्थलगत निरीक्षणका क्रममा बैंकले जारी निर्देशनहरूको पालनामा गम्भीर कमजोरी देखिएको राष्ट्र बैंकले जनाएको छ। निरीक्षण प्रतिवेदनमा औंल्याइएका त्रुटिहरू समयमै सुधार गर्न बैंकले चासो नदिएको, कर्जा नोक्सानी व्यवस्थापन सम्बन्धी प्रावधानहरू पालना नगरेको, तथा पुँजी पर्याप्तता अनुपात गणना सम्बन्धी निर्देशनहरू पालना नगरेको उल्लेख गरिएको छ। राष्ट्र बैंकले यस विषयमा बैंकका प्रमुख कार्यकारी अधिकृतलाई सचेत गराएको छ।
-----
एनआईशी एशियाको संस्थागत सुशासनमा भ्वाङैभ्वाङ, चार कारण देखाएर राष्ट्र बैंकको कारबाही
