नेपाली बजारमा हालसम्म कै ठूलो आईपीओ निष्कासन गरेर सर्वाधिक चर्चा कमाएको नेपाल इन्फ्रास्ट्रक्चर बैंक लिमिटेड (निफ्रा) नेपाल स्टक एक्सचेञ्जमा सूचीकृत भएको एक पब्लिक कम्पनी हो ।
बैंककाे परिचय
पूर्वाधार क्षेत्रमा लगानी जुटाउने मुख्य उद्देश्यका साथ नेपाल इन्फ्रास्ट्रक्चर बैंक लिमिटेड २०७५ साल फागुन २२ गते, बुधबारदेखि सञ्चालनमा आएकाे थियाे । पूर्वाधार विकासमा मात्र केन्द्रीत भई काम गर्ने गरी विद्यमान बैंक तथा वित्तीय संस्थाभन्दा फरक बैंकको रुपमा नेपाल सरकारसहित बैंक, बीमा र अन्य सार्वजनिक तथा निजी क्षेत्रको लगानीमा मुलुकको पहिलो पूर्वाधार विकास बैंकको रुपमा इजाजत प्राप्त गरी अहिले बैंक सञ्चालनको तेस्रो वर्षमा रहेको छ ।
बैंकले सार्वजनिक तथा निजी साझेदारीमार्फत नेपालको पूर्वाधार विकासका लागि यातायात, कृषि, ऊर्जा, पर्यटन, सेज, आधुनिक शहरी पूर्वाधार, सूचना प्रविधीलगायतको क्षेत्रमा काम गर्ने लक्ष्य रहेको छ ।
निफ्राको लगानी पहलमा काभ्रे जिल्लाको पाँचखालमा 'स्मार्ट सिटी' विकास गरिने भएको छ । पाँचखाल नगरपालिकासँगको सहकार्यमा निर्माण गरिने 'स्मार्ट सिटी' को बजार अध्ययन गर्न निफ्राले एक कम्पनीलाई नियुक्त गरिसकेको छ । निफ्राले अमेरिकाको जेएलएल नामक संस्थालाई बजार अध्ययन गर्न लगाउने भएको हो । निफ्राले पाँचखाल नगरपालिकासँग गत साउन १२ गते नगरलाई ‘स्मार्ट सिटी’ बनाउने सहकार्यमा सात शर्तसहितको सम्झौता गरेको थियो । करिब ४५ सय रोपनी क्षेत्रफलमा 'स्मार्ट सिटी' विकास गरिनेछ । यसभित्र पूर्वाधार विकासका लागि करिब साढे दुई अर्ब रुपैयाँ लाग्ने प्रारम्भिक अनुमान गरिएको छ ।
