काठमाण्डौ । सिटिजन्स बैंक इन्टरनेशनल लिमीटेडले आर्थिक वर्ष २०७७/७८ मा आफ्ना सेयरधनीलाई १४.३६ प्रतिशतसम्म लाभांश वितरण गर्नसक्ने देखिएको छ ।
कोभिड महामारीका बीच बैंकले कतिपय सूचकहरुमा राम्रो प्रगति गर्दै आफ्नो लाभांश क्षमतालाई दोहोरो अंकमै कायम गराउने सफलता पाएको हो ।
आर्थिक वर्ष २०७७/७८ का लागि बैंकको कुल वितरणयोग्य मुनाफा १ अर्ब ८० करोड ६१ लाख बढी रहेको छ । बैंकको चुक्तापूँजी १२ अर्ब ५७ करोड रुपैयाँ रहेको छ । यो हिसाबले बैंकले आफ्ना सेयरधनीलाई १४.३६ प्रतिशतसम्म लाभांश बाँड्नसक्छ ।
साना संस्था गाभ्दै ठूलो बन्ने अभियानमा रहेको यो बैंकले आर्थिक वर्ष २०७७/७८ को चौथो त्रैमाससम्म अघिल्लो आर्थिक वर्षको सोही अवधिको तुलनामा अधिकांश वित्तीय सूचकमा प्रगति गरेको देखिएको छ ।
