सिटिजन्स बैंकले कोरोना प्रभावित ऋणीको तत्काल धितो लिलाम नगर्ने जनाएको छ। मंगलबार बैंकले पत्रकार सम्मेलन गरी यस्तो जानकारी दिएको हो। ‘बाँच र बचाऊ रणनीतिअन्तर्गत कोरोना प्रभावित व्यवसायीलाई अझै सहयोग गर्ने पक्षमा छौैं,’ बैंकका नायब प्रमुख कार्यकारी अधिकृत बोधराज देवकोटाले भने, ‘कोरोनाअघि डिफल्ट भइसकेकाको हकमा भने नियमानुसार असुली हुन्छ।’
कोरोना महामारीले प्रभावित व्यवसायीलाई नेपाल राष्ट्र बैंकको निर्देशन अनुसार बैंकले गत आर्थिक वर्ष २६ करोड रूपैयाँ छुट दिएको जनाएको छ। देवकोटाले कोरोना महामारीको बेला समग्र अर्थतन्त्रमा समस्या आउँदा पनि गत आर्थिक वर्ष र अहिलेको दोस्रो चौमासको तुलना गर्दा बैंकले समग्रमा १२ प्रतिशतले वृद्धि गरेको जानकारी दिए। बैंकको खुद ब्याज आम्दानी १२.३९ तथा नेट फी एन्ड कमिसन १८ प्रतिशतले वृद्धि भएको जनाइएको छ। सञ्चालन नाफा, ट्रेडिङ आम्दानी पनि वृद्धि भएको बैंकले जनाएको छ। कोरोना महामारीकै अवधिमा वितरणयोग्य नाफा ३६.५५ प्रतिशतले वृद्धि भएको देवकोटाले बताए।
